ຍົສ

ຍົສ
ໂດຍ ສາຍເຊລຳເພົາ

ຍະສະກວ້າງກຽດກ້ອງ ກຳປະນາດລືຊາ
ຜາກົດຕົວນາມກະເລື່ອງລື ດັງໄກພັນລີ້
ມີຄົນຍໍນິຍົມຍ້ອງ ຮັກຫອມຊ້ອງຊໍ່
ນັບຖືໂຮມນອບນ້ອມ ລືກຽນກ້ອງດັງໄກ

ຍົດສັກຄົນຢາກໄດ້ ຊັ້ນຕໍາແໜ່ງກຽດສັກສີ
ຊັ້ນນາຍພັນນາຍພົນ ຫົວໜ້າກົມກໍພໍໃຊ້
ໄດ້ນາຍພົນຕີແລ້ວ ນາຍພົນໂທຢາກຕື່ມ
ພົນເອກຍັງໜຶ່ງຊັ້ນ ຂໍໃຫ້ໄດ້ກ່ອນກະສຽນ

ບາງຄົນໄດ້ພະແນກແລ້ວ ຢາກໄດ້ຕໍ່ຫົວໜ້າກົມ
ຫົວໜ້າກົມຍັງບໍ່ພໍ ຢາກໄດ້ຮອງຣັດຖະມົນຕີພຸ້ນ
ຊາມກະສຽນຂໍໃຫ້ໄດ້ ເປັນລັດຖະມົນຕີກະໄຄແນ່
ຄັນບໍ່ເປັນດັ່ງເວົ້າ ນາຍົກພຸ້ນບ່ອນໝາຍ

ອັນວ່າຍົດບໍ່ແມ່ນຮ້າຍ ໃຜໄດ້ຍົດມີສັກສີ
ເຂົາວ່າມີດີກຣີ ກວ່າຄົນທັງຄ້າຍ
ຄັນເປັນນາຍຄົນໄດ້ ຍັງໃຄກວ່າເປັນໄພ່
ຄັນບໍ່ເປັນດັ່ງເວົ້າ ມີເງິນໃຊ້ຫຼາຍຫຼາກລົ້ນ ຍົດກໍເພີ້ມລື່ນກວ່າຄົນ ແລ້ວນາ

- ຍົດນີ້ເປັນສິ່ງຍ້ອງ ໃຫ້ຄົນຕື່ມລາຄາຄົນ
ຄົນທີ່ມີນາມະຍົດ ພັດເດັ່ນດັງພະລັງກ້າວ
ຍົດກໍພາວໆເຫຼື້ອມ ເຮັດຫຍັງກໍໄດ້ງ່າຍ
ຍົດສັກມີເດັ່ນແລ້ວ ລວຍກໍເພິ້ມຕື່ມຍົດດີ

ມີຍົດເໝືອນດັ່ງໄດ້ຂີ່ຊ້າງ ສານເອກຕົວມຸງຄຸນ
ມີຍົດເປັນເໝືອນດັ່ງ ມີເງິນຄໍາໂກດກືກອງລ້ານ
ມີຍົດຄົນນິຍົມຍ້ອງ ໃຜໆກໍໃຫ້ກຽດ
ມີຍົດຄັນວ່າທໍາບາບໃບ້ ກໍເດີນເຂົ້າສູ່ອະບາຍ

ຄົນມີຍົດທໍາບຸນສ້າງ ຫວັງໄດ້ຍົດປາຣະມີ
ມີຍົດທໍາຄວາມດີ ເດັ່ນກໍຢູ່ສຸກສະສົມສ້າງ
ມີຍົດທໍາກຸສົນພ້ອມ ໃຫ້ຊຸມຊົນໄດ້ເພິ່ງ
ມີຍົດຄັນຫຼົງຍົດດາຍລ້າ ກໍເປັນບ້າຍົດບໍ່ເຊົາ

ຍົດທີ່ວ່ານີ້ ຄືກຽດກັບສັກ
ມີຍົດຄົນຫອມຮັກ ເທົ່າກັບມີເງິນຕື້
ມີຍົດບໍ່ມີຄົນຫວນຮູ້ ຄວາມດີຈັກສະໜ່ອຍ
ມີແຕ່ກົງຈ້ອຍໆ ຫັນໜ້າສູ່ອະບາຍ ພຸ້ນແລ້ວ