ຍຸກອະຣິຍະເມດໄຕເກີດຂຶ້ນໄດ້ ຫາກໃຈຄົນມີທັມ

ຣະບົບໃດ ສີວິໄລ ໄດ້ທັງນັ້ນ
ຫາກມະນຸດ ທຸກຊົນຊັ້ນ ຮູ້ຈັກທັມ
ຫາກມະນຸດ ເຊື່ອສັດທາ ໃບບຸນກັມ
ກໍຈະນໍາ ມະນຸດ ໃຫ້ພົ້ນໄພ

ອັນມະນຸດ ທຸກຊົນຊັ້ນ ທົ່ວທັງໂລກ
ຈະເປັນໂຈກ ເປັນໃຫຍ່ ສຸດພຽງໃດ
ຈະສູງຄ່າ ມີຍົດສັກ ທັງນ້ອຍໃຫຍ່
ກໍຢາກໄດ້ ອິດສະຫຼະ ສະເໝີກັນ

ທັງຄົນທຸກ ຄົນຈົນ ຄົນຕໍ່າຕ້ອຍ
ຄົນທີ່ດ້ອຍ ວາດສະໜາ ຄ່າບໍ່ສູງ
ເປັນຊາວນາ ກັມມະກອນ ຊີວິດຫຍຸ້ງ
ໃຈໝັ້ນມຸ້ງ ລ້ວນຢາກໄດ້ ໃນເສຣີ

ສັນຕິພາບ ສະເໝີພາບ ສັນຕິສຸກ
ອິດສະຫຼະ ເສຣີພາບ ນິຣາດທຸກ
ເປັນສິ່ງດຽວ ທີ່ທໍາໃຫ້ ພົ້ນຈາກທຸກ
ຄົນທຸກຍຸກ ໄຝ່ຝັນຫາ ມາຄອບຄອງ

ລ້ວນຢາກໄດ້ ດ້ວຍຄວາມຫວັງ ດ້ວຍໃຈປອງ
ຊົນທັງຜອງ ສ້າງສັນຫາ ມານານເຫິງ
ເໝືອນຍິ່ງຫາ ເໝືອນຍິ່ງຫ່າງ ຍິ່ງກະເຈີງ
ຝັນບໍ່ເຖິງ ສິ່ງເຫຼົ່ານັ້ນ ໄກແສນໄກ

ໃນຍຸກນີ້ ໂລກເລີດເລໍ້າ ສີວິໄລ
ທັນສະໄໝ ໃນເຄື່ອງມື ສ້າງໂລກສວຍ
ເຖິງປານນັ້ນ ໂລກກັບຫັນ ສູ່ຄວາມປ່ວຍ
ມະນຸດສ້ວຍ ໃຈກໍສັ້ນ ຮໍ່າຮັ່ນກັນ

ຖືຄະຕິ ຂອງຕົນເອງ ເປັນສໍາຄັນ
ຊ່ວງເສງກັນ ຍາດແຍ້ງ ແບ່ງກັນຄອງ
ມີໂອກາດ ກໍຍົກພວກ ເຂົ້າປະລອງ
ຊົນທັງຜອງ ລ້ວນລຸ້ມຫຼົງ ໃນທິດຖີ

ຊົນທຸກຝ່າຍ ລ້ວນອ້າງວ່າ ພວກຕົນດີ
ມີເສຣີ ມີສັນຕິ ມີຄວາມສຸກ
ແລ້ວບັງຄັບ ຄູ່ເຂັນ ທັງບຸກລຸກ
ສ້າງຄວາມທຸກ ທົ່ວທັງໂລກ ໂສກອະນັນ

ໃນທີ່ສຸດ ຊົນທຸກຝ່າຍ ລ້ວນເໝືອນກັນ
ໃຜເສກສັນ ໃຫ້ໂລກເປັນ ດັ່ງທີ່ເຫັນ
ຫາກເຮົາຮູ້ ທາດແທ້ ຂອງກົດເກນ
ກໍຈະເຫັນ ໃນບັນຫາ ສະເໝີກັນ

ອັນຄວາມທຸກ ມະນຸດມີ ທຸກໆຊາດ
ຫາກຄົນຂາດ ທັມມະ ໃນດວງຈິດ
ຂາດສິນທັມ ຂາດປັນຍາ ໃນຊີວິດ
ກໍສູນສິດ ເສຣີ ມານມາຄອງ

ຍຸດຕິທັມ ຈະບໍ່ເກີດ ດ້ວຍອໍານາດ
ສິດກໍຂາດ ຫາກຄວາມໂລບ ເຂົ້າມາຄອງ
ຄວາມສູນເສັຍ ຫາກຄວາມຫຼົງ ເຂົ້າມາປອງ
ຄວາມໂກດຄອງ ຂົ່ມຂູ່ ຢູ່ນິຣັນ

ໂລກວິໄລ ດ້ວຍມະນຸດ ເຮົາສັນສ້າງ
ໂລກບໍ່ຮ້າງ ຫາກມະນຸດ ມີໃຈສູງ
ໂລກບໍ່ສູນ ຫາກມະນຸດ ສ້າງສົມດູນ
ຈະພອກພູນ ດ້ວຍທັມມະ ຊະນະໄພ

ຄົນມີທັມ ໂລກມີທັມ ທັມເປັນໃຫຍ່
ອະຣິຍະ ເມດໄຕ ກໍມາເຖິງ
ໝາຍຄວາມວ່າ ມະນຸດຊົນ ລ້ວນກໍ້າເກິ່ງ
ຍັງອີກເຫິງ ຫາກມະນຸດ ຍັງມົວເມົາ

ອະຣິຍະ ເມດໄຕໂຍ ໝາຍຄວາມວ່າ
ຄວາມເມດຕາ ຍິ່ງໃຫຍ່ ໃນສາກົນ
ທັມປະເສີດ ດ້ວຍປັນຍາ ໝົດທຸກຄົນ
ໂລກຈຶ່ງພົ້ນ ຈາກວິນາດ ສະເໝີກັນ

ມີເມດຕາ ຍັງບໍ່ພໍ ພຽງເທົ່ານັ້ນ
ຄົນທຸກຊັ້ນ ຄຸ້ມຄອງທັມ ໃຫ້ຖ້ວນຄົບ
ໃນທໍານົບ ພົມວິຫານ ທຸກຂໍ້ຈົບ
ຈຶ່ງຈະພົບ ອະຣິຍະ ດັ່ງຄາດໝາຍ

ພົມວິຫານ ເປັນຍອດທັມ ຄຸ້ມຄອງໂລກ
ຄົນເປັນໂຈກ ຄຸ້ມຄອງທັມ ສະເໝີເໝືອນ
ຫາກມະນຸດ ປະລະທັມ ໂລກສະເທືອນ
ໂລກສະເນືອນ ຄົນເນືອງນັນ ສັ່ນສາຍຈິງ

ອາການຂອງຄົນເມົາ ຄວາມເມົາຫ້າຢ່າງ

- ສຸຣາແປໃຫ້ແຈ້ງ ສອດຄ່ອງພາສາສັບ ແທ້ນັ້ນ
ເວົ້າຄວບກັນສຸຣາເຫຼົ້າ ກິນແລ້ວເມົາທຸກເທື່ອ
ເມຣະຍະຄືຄວາມເມົາແທ້ ກິນສຸຣາກໍເມົາມືດ
ເຖິງບໍ່ກິນນໍ້າເຫຼົ້າ ມົວບ້າກໍວ່າເມົາ
- ໝາຍຄວາມວ່າເມຣະຍະນີ້ ແບ່ງອອກເປັນສອງຄວາມໝາຍ
ເມົາສຸຣາຢາດອງ ຜ່ອງເບັຍກໍເມົາເປັ້ຍ
ເຜົາຜົວເມັຍທັງກາຍກ້ຽງ ເມົາຕັນຫາພາໂຫດ
ເມົາຢົດສັກຕໍາແໜ່ງຊັ້ນ ເຂົາກໍຮຽກວ່າເມົາ
- ມີວິຊາການກ່າວເວົ້າ ແຈກແບ່ງອາການເມົາ
ຊິແມ່ນເມົາສຸຣາ ຕັນຫາກໍແມ່ນຣວມຢູ່ໃນນີ້
ເມົາຄວາມມີຄວາມບ້າ ອະວິຊາມືດບອດ
ແບ່ງອອກເປັນຫ້າຂໍ້ ມາຟັງເລື່ອງກ່າວຖະແຫຼວງ
- ຂໍ້ໜຶ່ງ SMART ສະຫຼາດລໍ້າ ເມົາອວດເກ່ງເສງລອງ
ຄວາມຜະຫຍອງຫຼົງຕົວ ອວດວິຊາຄວາມຮູ້
ເມົາສຸລາພຽງນ້ອຍ ກໍບໍ່ຫຼາຍຍິ່ງກວດເກ່ງ
ເຖິງບໍ່ກິນນໍ້າເຫຼົ້າ ຫາກເມົາຮູ້ອວດວິຊາ
- ເຂົາກໍທຽບເປັນພວກບ້າ ເມົານໍ້າທ່າຫຼືນໍ້າລາຍ
ເມົາວິຊາທະນົງໂຕ ອວດໂອຈົນເປັນບ້າ
ມີວິຊາພຽງນ້ອຍ ຫຼືຫຼວງຫຼາຍພາຍມາກ
ໃຜບໍ່ທັນທຽບໄດ້ ບັນຍາຍສ້າງບໍ່ເຊື່ອງອຳ
- ຂໍ້ທີສອງນັ້ນ GOOD LOOKING ດູດີລໍ້າ ເມົາຈັກໜ່ອຍຍັງບໍ່ແຮງ
ຫາກຄວາມເມົາມາແຊງ ນຶກວ່າຕົນດີລໍ້າ
ທຸກທີ່ທໍາທັງເວົ້າ ເຫັນດີໄປທຸກທີ່
ມີບໍ່ມີກໍອວດອ້າງ ດີບໍ່ດີກໍກ່າວຍ້ອງ ໃຫ້ຄົນຮູ້ວ່າຕົນດີ.
- ເມົາໃນຣະດັບນີ້ ຍັງດີແນ່ເມົາບໍ່ຫຼາຍ
ແຕ່ວ່າເມົາກາຍຫຼົງທະນົງຕົວ ອວດດີຈົນເປັນເລື້ອງ
ມັນກໍເຄືອງຫູເພື້ອນ ວົງວານສະຫາຍຫ່າງ
ທຸກຢ່າງໃນໂລກນີ້ ເພາະດີລໍ້າລື່ນຄົນ.
- ເຮົາມັກເຫັນຢູ່ເລື້ອຍ ມີມາກໃນສາກົນ
ພວກທີ່ວົນມົວຫຼົງ ບໍ່ຮູ້ຄວາມຈິງສັງຂານຊໍ້າ
ນຶກວ່າຕົນຈະຄົງໝັ້ນ ສັງຂານບໍ່ແປປ່ຽນ
ຄວາມເຈັບເປັນເຖົ້າແກ່ນັ້ນ ບໍ່ມີມື້ປ່ຽນແປງ
ຂໍ້ທີສາມ RICH ຣວຍເລີດລໍ່າ ມີຮັ່ງໄປທັງໝົດ
ເງິນທອງມີເທົ່າໃດ ຈ່າຍກິນບໍ່ກົວຢ້ານ
ຄັນວ່າເມົາພຽງນ້ອຍ ເຫັນສາວງາມມາທຽງພ່າງ
ໃຊ້ຈ່າຍເກີນທີ່ໄດ້ ກິນກ້ຽງບໍ່ໃຫ້ຫຼໍ່
- ແມ່ນວ່າເງິນບໍ່ຍັງຢູ່ຄ້າງ ສ້ຽວເສດຕິດຖົງ
ສ້ອຍຄໍແຫວນທັງລົດ ຈ່ອງຈໍາກິນກ້ຽງ
ວ່າແຕ່ມີຄົນຍ້ອງ ຫຼືຄົນລອງເວົ້າຂັດທ່າ
ກໍອວດຣວຍຮັ່ງລົ້ນ ໃຫ້ຄົນຮູ້ວ່າຕົນດີ
- ຄົນທີ່ເມົາແບບນີ້ ມີມາກເຫັນຫຼາຍ
ບໍ່ກິນສຸຣາຢາເມົາ ກໍຫາກມີຫຼາຍແທ້
ເຂົາວ່າເມົາມົວບ້າຕັນຫາຫັງ ມັນກໍາເລີບ
ທໍາບຸນທານແທ້ໆ ຍັງມົວບ້າກະຫາກມີ
- ບາງຄົນບໍ່ກິນນໍ້າເຫຼົ້າ ໃຈໃຫຍ່ຈ່າຍບໍ່ຖອງ
ອ້າງວ່າຕົນມີເງິນທອດທານ ໝົດຫຼາຍຕື້
ບຸນທີ່ຄວນຄືໄດ້ ບໍ່ມີຈັກສະໜ່ອຍ
ທໍາບຸນດ້ວຍນໍ້າເຫຼົ້າ ຣາຄາຕື້ກໍເປົ່າຄົນ
- ອັນນີ້ເວົ້າໃຫ້ແຈ້ງ ຊີເຫດຊີ້ຜົນ
ທໍາກະຖິນກອງອັດຖະ ເພື່ອກິນເບັຍກິນເຫຼົ້າ
ເຮັດບຸນທານໝົດມື້ ໝົດເບັຍໄປຫຼາຍລ້ານກີບ
ບາດໂຕບຸນແທ້ໆ ບໍ່ເຖິງລ້ານເສດປາຍ
- ຂໍ້ທີສີນັ້ນ BULLET PROOF ເມົາແລ້ວກ່າວໂວຫານ
ບໍ່ຢ້ານໃຜຈັກຄົນ ອວດຄົງຂະໜານກ້າ
ບໍ່ມີໃຜຫານທ້າ ຄົງກະພັນໝັ້ນແກ່ນ
ຕົບຕ່ອຍດີກະບໍ່ຢ້ານ ພານເລື້ອຍບໍ່ຖອຍ
- ຕົບຕ່ອຍຕີເລັກນ້ອຍ ນຶກວ່າລອງວິຊາ
ເມົາສຸຣາທັງເບັຍ ເກ່ງເກີນພົນລ້ານ
ກາຍເປັນຄົນພານຫາເລື້ອງ ລອງດີໄປທຸກທີ່
ເມົາແລ້ວອວດໂອ້ ນັກມວຍຢ້ານແລ່ນໜີ
- ເມົາຂໍ້ທີຫ້ານີ້ INVISIBLE ເຂົາຮຽກວ່າຫາຍຕົວ
ບໍ່ສົນຊາຄວາມອາຍ ວ່າແຕເມົາເຖິງຣະດັບແລ້ວ
ເຮັດຫຍັງບໍ່ສົນແທ້ ບໍ່ຮູ້ຕົວຈັກຢ່າງ
ເມົາຈົນລືມແກ້ຜ້າ ຈົນຄົນຢ້ານແລ່ນໜີ
- ຄົນທີ່ເມົາແບບນີ້ ບໍ່ຮູ້ຊົ່ວບໍ່ຮູ້ດີ
ສັກສີສູນຫາຍໝົດ ທຸກຢ່າງຫາຍເຫີຍສ້ຽງ
ອັນວ່າເມົາສຸຣານັ້ນ ສັກສີສູນເສື່ອມ
ຮ່າງກາຍເຈັບປວດຊໍ້າ ໂຣຄາເຂົ້າຄອບຄອງ
- ອັນວ່າເມົາໂລບລ້ຽວ ຫຼົງຍົດສັກສີ
ເມົາຕັນຫາຣາຄີ ແມ່ນຕົວຕາຍບໍ່ຫາຍຊໍ້າ
ກໍຈັກນໍາຕົນເຂົ້າ ອະບາຍພູມຕົກຕໍ່າ
ຊີວິດຍັງກໍຊອກຊໍ້າ ພາຍທ້າຍຫາກຊິເຫັນ ທ່ານເອີຍ

ຢ່າທໍາຮ້າຍແຜ່ນດິນລາວ

ແຜ່ນດິນລາວ ກວ້າງໃຫຍ່ ມະຫາສານ
ບັນພະການ ດິນລາວ ໃຫຍ່ເຫຼືອຫຼາຍ
ເຖິງແມ່ນວ່າ ມານຮາວີ ເກືອບກະຈາຍ
ລາວບໍ່ກາຍ ເປັນຊາດອື່ນ ຄົນລາວຍັງ

ດິນແດນລາວ ດຽວນີ້ ເຫຼືອນ້ອຍແທ້
ເຫຼືອຕັ້ງແຕ່ ເນື້ອທີ່ ສອງແສນປາຍ
ສາມຮ້ອຍປີ ສັດຕູມານ ຫວັງທໍາລາຍ
ລາວບໍ່ກາຍ ເປັນອື່ນ ຍັງຍືນຍົງ

ໃນຍຸກນີ້ ດິນແດນລາວ ມີຄວາມສ່ຽງ
ລາວອາດກ້ຽງ ໝົດຊາດໄປ ໃນບໍ່ເຫິງ
ຫາກຄົນລາວ ບໍ່ຮູ້ລາວ ຢ່າງເລິກເຊິ່ງ
ອາດບໍ່ເຫິງ ລາວອາດສູນ ມູນອາດຫາຍ

ໃນຍຸກນີ້ ຄົນລາວ ບໍ່ຮູ້ຊາດ
ຍັງອາຄາດ ທໍາຮ້າຍຊາດ ດ້ວຍທິດຖີ
ບໍ່ຮູ້ຈັກ ສ້າງຄຸນຄ່າ ທາງໄມຕຣີ
ສາມັກຄີ ປອງດອງ ຄອງອັນຄວນ

ບາງຄົນທໍາ ບາງຄົນຄິດ ບາງຄົນເວົ້າ
ບໍ່ເປັນເຈົ້າ ເອກະລາດ ວັດທະນະທັມ
ຍັງຖືໂຕ ຍັງທໍາຮ້າຍ ສ້າງບາບກັມ
ບໍ່ຊັກນໍາ ສະຕິຊາດ ພິລາດໄພ

ລາວຈະຍົງ ລາວບໍ່ສູນ ຫາກລາວສູ້
ລາວຕ້ອງຮູ້ ປົກປ້ອງຊາດ ດ້ວຍພາສາ
ຢູ່ແດນໃດ ຍັງຮູ້ຮີດ ພັດທະນາ
ສາສາສາ ຈາຮີດລາວ ວັດທະນະທັມ

ລາວທັງຫຼາຍ ຄວນຮັກຊາດ ໃຫ້ຖືກຕ້ອງ
ມາປອງດອງ ສ້າງຄ່າລາວ ໃຫ້ສູງສັກ
ພັດທະນາ ອັກສອນຊາດ ໃຫ້ປາຈັກ
ເອກະລັກ ຊາວລາວຄົງ ບໍ່ມີຄາຍ